巴士強制佩戴安全帶的新法例已於1月25日正式實施。根據規定，只要巴士座位設有安全帶，乘客就必須佩戴，否則屬違法行為，最高可被判罰款5,000元及監禁3個月。不過，新例一出，意外引發另一個「都市奇觀」——乘客扣錯安全帶。
近日，不少網民在社交平台分享親身經歷，指搭巴士時發現旁邊乘客誤把自己座位的安全帶扣走，結果自己反而「無帶可扣」。有女乘客無奈吐槽：「阿叔扣咗我安全帶，我咁扣咩？」場面相當尷尬。
有乘客目睹鄰座誤扣他人安全帶，一時之間進退失據，心諗到底應唔應該出聲提醒。
事件亦引起網民熱議，有人疑惑：「如果咁樣俾警察見到，究竟拉邊個？」亦有人發揮幽默感笑言：「冬天嚟㗎啫，佢幫你焗暖條帶，陣間就還。」
Threads瘋傳扣錯安全帶實錄
多名網民在Threads上載相片，指出鄰座乘客錯手扣走他人安全帶，令「受害者」全程心驚膽跳。有人目擊後猶豫是否出聲提醒：「見到對面嗰個人扣錯咗人哋條帶，我應唔應該講？」亦有女網民直言被「搶帶」後只好苦笑。
有女網民分享，鄰座大叔誤把她座位的安全帶扣走，令她哭笑不得。
留言區瞬間變成創意大會——
「你扣返佢嗰條，交叉成X形」
「一條唔夠安全，要兩條先安心」
「估唔到扣安全帶原來係智商測驗」
「成架巴士織到變結界」
亦有網民打趣建議：「你問佢有冇5,000蚊，冇嘅話就叫佢還返條帶你。」
新例原意係保障乘客安全，卻意外測試大家對「自己條安全帶」嘅辨認能力。看來，真正需要適應嘅，唔止係扣帶呢個動作，仲有一點點公共空間嘅默契。